Follow us on:

I Ngarkuari me Punë, Mustafë Xhemaili, mori pjesë në manifestimin për nderë të Ditës Botërore të Poezisë

Cyrih, 20 mars 2016 - I Ngarkuari me Punë në Ambasadën e Kosovës në Bernë, Mustafë Xhemaili, mori pjesë në manifestimin letrar, të organizuar nga Shoqata e Shkrimtarëve Shqiptarë në Zvicër (SHKSHZ) për nderë të Ditës Botërore të Poezisë.

Manifestimi u mbajt në lokalet e Qendrën Kulturore të Kosovës në Cyrih, ku u bë përurimi i veprave: “Zonja me të kuqe”, roman nga autorja Majlinda Nana Rama, si dhe dy përmbledhje poezish: “Në krahët e ëndrrës“ të autores së re  Fatmire Zenelaj-Sopa dhe  “Muranat e muzgut“ të autorit Shaip Beqiri. Me këtë rast, në prani të artdashësve të ardhur nga kantone të ndryshme të Zvicrës, SHKSHZ  shënoi Ditën Botërore të Poezisë. Romani “Zonja me të kuqe”i letrares Majlinda Nana Rama, një botim i Shtëpisë Botuese “Toena” nga Tirana,  është një roman që ka ngjallur interesim të konsiderueshëm te lexuesit, gjë të cilën e theksuan kritikët letrarë, gjatë debatit që u zhvillua.

Romansierja ndonëse e re si autore, ajo tani është bërë një emër i njohur në letrat e sotme shqipe. Ajo është fituese e disa çmimeve kombëtare dhe, kësaj radhe, kishte ardhur enkas nga Tirana për të komunikuar me lexuesit e saj në Zvicër pikërisht në ditën ndërkombëtare të poezisë. Fatmire Zenelaj-Sopa autore e dy librave me poezi, kësaj radhe promovoi librin e saj të ri “Në krahët e ëndrrës“, botim i Shtëpisë Botuese “Naim Frashëri“ nga Fushë Kosova, u vlerësua për aftësinë e krijimit  të vargut të qëndrueshëm, me figura e variacione të sublimuara brenda tekstit letrar. “Muranat e muzgut“ e Shaip Beqirit, një autor i njohur në letrat shqipe bashkëkohore,u vlerësua lart duke vënë theksin se,autori është një shembull poetik nga i cila duhet të mësoj e përfitoj, sidomos gjenerata e re e poetëve. Në fund autorët u përgjigjen në pyetjet e shumta të të pranishmëve, duke krijuar kështu një atmosferë të këndshme letrare e miqësore për nderë të ditës së poezisë21 marsit,të cilën në vitin 1999UNESKO, e ka shpallur Ditë Botërore të Poezisë.