Follow us on:

Ambasada e Kosovës në Kanada bashkorganizoi meshë për Shën Terezën

Otavë, 16 tetor 2016 – Ambasada e Republikës së Kosovës, në bashkëpunim me Ambasadën e Shqipërisë dhe atë të Maqedonisë në Kanada, si dhe Nunciaturën e Selisë së Shenjtë, misionin diplomatik të Indisë në këtë shtet, si dhe famullinë e Nënë Terezës në Otavë, kanë organizuar meshën falënderuese me rastin e kanonizimit të Shën Terezës.

Mesha falënderuese u mbajt në  Kishën e Shën Xhonit në Ottavë dhe është udhëhequr nga arqipeshkvi i Ottavës, Terrence Prendergast, së bashku me arqipeshkvin Luixhi Bonazzi njëherëësh dhe Nunc i Selisë së Shenjtë në Ottavë. 

Ambasadori i Republikës së Kosovës në Kanada, Lulzim Hiseni, iu drejtua të pranishmëve me një fjalë përshëndetëse për lidhjet e Kosovës me Nënë Terëzën. Në fjalën e tij, ambasadori Hiseni, kujtoi të pranishmit se Nënë Tereza ose Gonxhe Bojaxhiu ka nisur rrugëtimin e saj fetar e misionar në Letnicë. “Atëbotë, për popullin e Kosovës, shpresa lidhej me emrin e Nënë Terezës. Të duhej ushqim për familjen, atë e gjeje tek Shoqata “Nënë Tereza”. Të duhej mjeku, atë e gjeje në shtëpitë-spitale të kësaj shoqate, ku kanë lindur mijëra fëmijë, të cilët sot ecin krenarë në bulevardin kryesor të kryeqytetit tonë - Prishtinës, që mban emrin e Nënës tonë, Terezë dhe kanë mundësi të shohin në po atë bulevard, Katedralen me emrin e saj”, ka thënë ambasadori Hiseni.

Në këtë ngjarje të rëndësishme kulturore në Otavë, kishte prezencë shumë të lartë, me mbi pesëqind persona, ndër ta, të pranishëm ishin personalitete të rëndësishme fetare, të shoqërisë civile, zyrtarë të ndryshëm kanadezë, kori diplomatike, si dhe një numër i konsideruar nga pjesëtarë të komunitetit të diasporës tonë nga Torontoja, Montreali dhe Otava.